Cefnogi arweinwyr disglair yn y trydydd sector

Nod Bwrsari Arweinyddiaeth Walter Dickie yw helpu arweinwyr yn y trydydd sector i ddatblygu eu sgiliau arwain entrepreneuraidd. Bob blwyddyn bydd WCVA yn rhoi £2,500 i gefnogi unigolyn yng Nghymru i wella fel arweinydd.Walter Dickie medium
 
Fel aelod o fwrdd WCVA cafodd arbenigedd a phrofiad Walter Dickie, a'i ymroddiad i'r trydydd sector, effaith ddofn ar waith WCVA ac ar y rheini a gafodd y pleser o weithio gydag ef.

Bu Walter yn cefnogi WCVA am dros ddeng mlynedd fel ymddiriedolwr gan chwarae rôl allweddol yn llywio'r mudiad ac yn helpu i sefydlu'r Gronfa Fuddsoddi Cymunedol arloesol sy'n benthyg arian i fusnesau cymdeithasol. Mae'r gronfa honno'n dal ar waith heddiw, yn wir hi yw conglfaen cymaint o'n gweithgaredd buddsoddi cymdeithasol presennol.

Diolch i ymroddiad Walter, mae WCVA wedi gallu rhoi benthyg dros wyth miliwn o bunnoedd i fudiadau cymunedol, llawer ohonynt ar waith yn ardaloedd mwyaf difreintiedig Cymru. Ymysg llwyddiannau di-rif, mae'r gronfa wedi helpu i achub y tafarndai olaf mewn cymunedau gwledig, rhoi hwb cychwynnol i ffyniant chwaraeon eithafol yn y Gogledd, darparu amgylchedd diogel i blant y mae eu gofal maeth wedi methu, adfer hen adeiladau at ddefnydd y gymuned, creu cannoedd o swyddi a galluogi cymunedau i reoli asedau yn eu trefi a'u pentrefi eu hunain.

Yn drist iawn, bu farw Walter eleni felly er cof amdano, ac i barhau i ddatblygu'r arweinyddiaeth entrepreneuraidd yn y trydydd sector y rhoddodd ef gymaint o amser i'w chefnogi, mae WCVA wedi sefydlu Bwrsari Arweinyddiaeth Walter Dickie.

Mae'r bwrsari nawr ar agor i ymgeisiadau. Lawrlwythwch y ffurflen ymgeisio.

Cyn ymgeisio, rydym yn awgrymu eich bod yn cael sgwrs anffurfiol ynglŷn â'r broses gyda Buddsoddiad Cymdeithasol Cymru drwy ebostio sic@wcva.org.uk neu ffonio 0300 111 0124.

Mae'r rownd yn cau ar 18 Hydref 2019.

Ynglŷn â'r bwrsari

Bydd bwrsari gwerth £2,500 yn cael ei ddyfarnu bob blwyddyn i rywun mewn rôl arwain o fewn mudiad trydydd sector yng Nghymru i'w helpu i ddod yn arweinydd mwy entrepreneuraidd. Gallai hyn fod yn rhywun sy'n gweithio mewn menter gymdeithasol sydd â syniad i ddatblygu eu gweithgaredd masnachu, neu arweinydd yn y trydydd sector sydd am gynhyrchu incwm drwy fasnachu am y tro cyntaf.

Mae'r terfynau ar sut y gellir gwario'r bwrsari yn agored ac anogir ymgeiswyr i feddwl am syniadau diddorol i gefnogi eu datblygiad eu hunain fel arweinydd entrepreneuraidd. Roedd Walter wrth ei fodd yn teithio ac yn dysgu, ac roedd WCVA am i'r bwrsari hwn adlewyrchu hynny. Gellid, er enghraifft, ddefnyddio'r arian:

  • ar gwrs astudio penodol
  • i ariannu ymweliad, dramor o bosib, i weld y ffordd y mae eraill yn gwneud pethau, neu
  • unrhyw beth y mae'r buddiolwr yn teimlo a fydd yn ei symud ymlaen ac yn symud ei fudiad ymlaen

Eich dychymyg yw'r unig gyfyngiad!

Does dim system sgorio ffurfiol ar gyfer ceisiadau. Mae'r panel beirniadu yn chwilio am y cynnig sy'n eu hysbrydoli fwyaf ac sy'n cyd-fynd ag ethos y bwrsari. Y cwbl y gofynnir amdano yn ôl yw bod ymgeiswyr llwyddiannus yn rhannu eu profiadau o fewn eu mudiadau eu hunain, â WCVA ac â'r sector ehangach.

Enillydd 2018

Isla Horton OG

Cyhoeddwyd mai Isla Horton, Cydlynydd Datblygu'r elusen Tyfu Caerdydd, yw'r ail berson erioed i ennill y bwrsari gwerth £2,500 yng Nghyfarfod Cyffredinol Blynyddol WCVA yng Nghanolfan Mileniwm Cymru ar 22 Tachwedd 2018.

Bydd y bwrsari yn galluogi Isla i fynd ar daith astudio ym Montreal, Canada, gan ymweld â mudiadau uchel eu parch ar hyd a lled yr ardal sy'n hybu adnoddau naturiol ac yn adfywio eu cymunedau drwy brosiectau garddio - yn ogystal ag ymweld ag ysgolion lleol lle maent yn defnyddio garddio fel ffordd o ddysgu yn y cwricwlwm drwyddo draw.

Bydd y bwrsari hefyd yn talu i Isla ymgymryd â thri chwrs astudio yng nghanolfan garddwriaeth therapiwtig Thrive yn Reading.

Bydd Isla yn defnyddio'r hyn y mae'n ei ddysgu i gyfoethogi prosiectau Tyfu Caerdydd, gan gynnwys gwaith gydag ysgolion, presgripsiynu cymdeithasol, a gerddi cymunedol lleol. Bydd hi hefyd yn rhannu'r hyn mae'n ei ddysgu â'r sector ehangach a phartneriaid allanol drwy aelodaeth Tyfu Caerdydd o fudiadau trydydd sector amrywiol (gan gynnwys WCVA) ac ysgolion, a rhwydweithiau iechyd a llesiant a phresgripsiynu cymdeithasol ledled Caerdydd.

'Ychydig iawn o hyfforddiant dwi wedi'i gael heblaw am wrth weithio ac o reidrwydd ers sefydlu Tyfu Caerdydd, a hoffwn ddefnyddio'r bwrsari yma fel cyfle i feddwl a thyfu - amser i ddatblygu fy hun fel arweinydd, rhywbeth dwi'n aml wedi'i wrthod i'm hun, ond wrth feddwl am y peth, rhywbeth y mae arna'i ei angen yn fawr,' meddai Isla, 'dwi'n benderfynol o fod yr arweinydd y mae Tyfu Caerdydd yn ei haeddu ac y mae gen i'r potensial i'w fod os ydw i'n rhoi'r amser a'r lle i mi ddatblygu.' 

Enillydd 2017

AGM 2017 WDLB winner

Enwyd Steve Brooks o Sustrans Cymru fel y cyntaf i ennill Bwrsari Arweinyddiaeth Walter Dickie, yng Nghyfarfod Cyffredinol Blynyddol a Darlith Flynyddol WCVA yn Venue Cymru yn Llandudno ar 22 Tachwedd, 2017.

Nod yr elusen Sustrans Cymru yw ei gwneud yn haws i bobl gerdded a beicio yng Nghymru. Defnyddiodd Steve y bwrsari i ymrestru ar y cwrs 'Technolegau Newydd a Newid Ymddygiad', sy'n rhan o'r rhaglen Heriau Byd-eang Trafnidiaeth a gynhelir gan Raglen Arweinyddiaeth Rhydychen ym Mhrifysgol Rhydychen.

Steve Brooks Copenhagen

Bu i'r gronfa dalu hefyd i Steve fynd ar ymweliad astudio i Copenhagen ar gyfer y Copenhagenize Masterclass blynyddol, i ddysgu sut y llwyddwyd i droi eu dinas yn ganolfan drefol sy'n addas i feiciau. I roi hwb pellach i effaith gweithgareddau Steve trefnodd Sustrans fentora a chyngor strategol parhaus i ategu'r hyn a ddysgodd.

Darllen mwy am anturiaethau Steve yn ei gyfres o flogiau i WCVA:

Ailfeddwl entrepreneur

Cydweithio ymarferol

Pan foch yn Nenmarc

Gwaddol Walter Dickie: helpu mentrau dielw i ffynnu

Os oes gennych gwestiwn ynglŷn â'r broses ymgeisio cysylltwch â Buddsoddiad Cymdeithasol Cymru drwy ebostio sic@wcva.org.uk neu ffonio 0800 2888 329.